സിനിമാ പ്രേക്ഷകരെ ആവശം കൊള്ളിച്ച് ‘ആഹാ’ ട്രെയിലർ

പ്രേക്ഷകർ പ്രതീക്ഷയോടെ കാത്തിരിക്കുന്ന മലനാടിൻ്റെ തനതു കായിക വിനോദമായ വടം വലിയുടെ പശ്ചാത്തലത്തിലുള്ള ‘ആഹാ ‘ നവംബർ 19ന് തിയറ്ററുകളിൽ പ്രദർശനത്തിന് എത്തുന്നു. കാണികളെ ഉത്സവ പ്രതീതിയിൽ ആവേശം കൊള്ളിക്കുന്ന ഒരു മാസ്സ് എൻ്റർടൈനറാണ് എഡിറ്റർ കൂടിയായ ബിബിൻ പോൾ സാമുവൽ ആദ്യമായി സംവിധാനം ചെയ്ത ആഹാ ‘.

കഴിഞ്ഞ ദിവസം പുറത്തു വിട്ട ചിത്രത്തിൻ്റെ ട്രെയിലറിന് വൻ വരവേൽപ്പാണ് ലഭിച്ചത്. ഏതാനും മണിക്കൂറുകൾ കൊണ്ട് തന്നെ തരംഗമായിരിക്കയാണ് ട്രെയിലർ. ഒപ്പം തന്നെ പുതിയ സ്റ്റില്ലുകളും പുറത്തു വിട്ടിരിക്കകയാണ് അണിയറക്കാർ.

ഇന്ദ്രജിത് കേന്ദ്ര കഥാപാത്രത്തെ അവതരിപ്പിക്കുന്ന ‘ ആഹാ ‘യിൽ അമിത് ചക്കാലക്കൽ തുല്യ പ്രാധാന്യമുള്ള കഥാ പാത്രത്തെ അവതരിപ്പിക്കുന്നു. അശ്വിൻ കുമാർ, മനോജ് കെ ജയൻ എന്നിവരും പ്രധാനികളായി ചിത്രത്തിലുണ്ട്. ശാന്തി ബാലചന്ദ്രനാണ് നായിക. സാഹസികതയും, വൈകാരികതയും നിറഞ്ഞ ഒരു സ്പോർട്സ് ത്രില്ലറായിട്ടാണ് ‘ ആഹാ ‘ ദൃശ്യവൽക്കരിച്ചിരിക്കുന്നത്.

” ലക്ഷക്കണിക്കിന് ആരാധകരും ആയിരകണക്കിന് ടീമുകളും ഉള്ള ഒരു വലിയ കായികയിനമാണ് വടംവലി. കേരളത്തിന് അവകാശപ്പെടാവുന്ന നമ്മുടെ സ്വന്തം കളി.

പക്ഷെ മുറ്റത്തെ മുല്ലക്ക് മണമില്ല എന്നപോലെ വേണ്ടരീതിയിൽ അംഗീകരിക്കപ്പെടാത്ത സാധാരണക്കാരന്റെ കായിക വിനോദമാണ് വടംവലി.

ഈ തനത് ഇനത്തെ അതിന്റെ ഉശിരും വാശിയും ഭംഗിയും നിലനിർത്തികൊണ്ട് മലയോര മേഖലയിലെ ജീവിതവും, അവരുടെ ത്യാഗങ്ങളും, വടത്തോടുള്ള പ്രണയവും ആണ് ആഹായിലൂടെ പറയാൻ ശ്രമിക്കുന്നതെന്നാണ് സംവിധായകനായ ബിബിൻ പോൾ മാന്യുവൽ പറയുന്നത്.

കോട്ടയത്തിന്റെ പല ഭാഗങ്ങളിലായി എൺപതോളം ലൊക്കേഷനുകളിൽ പ്രതികൂല കാലാവസ്ഥയിൽ 200 ഓളം സിനിമ പ്രവർത്തകരും 6000ത്തോളം ജൂനിയർ ആർട്ടിസ്റ്റുകളുടെയും സഹകരണത്തോടെയാണ് ആഹാ ചിത്രികരിച്ചത്.

ആഹാ ഒരു മികച്ച തിയേറ്റർ എക്സ്പീരിയൻസ് ആയിരിക്കണമെന്ന് ഞങ്ങൾക്ക് അതിയായ ആഗ്രഹമുണ്ടായിരുന്നു. എല്ലാവരുടെയും പ്രാർത്ഥനപോലെ ഇപ്പോൾ ആഹാ ഈ നവംബർ 19 ന് വെള്ളിവെളിച്ചത്തിൽ ബിഗ് സ്ക്രീനിൽ എത്തിക്കാനായതിൽ അതിയായ സന്തോഷമുണ്ട്. ബിബിൻ പോൾ പറഞ്ഞുനിർത്തി.

ഇന്ദ്രജിത്, മനോജ് കെ ജയൻ, അമിത് ചക്കാലക്കൽ , അശ്വിൻ കുമാർ , സിദ്ധാർത്ഥ ശിവ, ശാന്തി ബാലചന്ദ്രൻ, മേഘ തോമസ് ,ജയശങ്കർ കാരിമുട്ടം തുടങ്ങിയ അഭിനേതാക്കളോടൊപ്പം 50 ഓളം പുതിയ അഭിനേതാക്കളും ഇതിൽ ഞങ്ങൾ അഭിനയിക്കുന്നുക്കുന്നു. വടംവലിയുടെ ആവേശത്തോടൊപ്പം പ്രണയവും, സൗഹൃദവും, സന്തോഷവും നിറഞ്ഞ ഒരു കുടുംബ ചിത്രമായിരിക്കും ആഹാ.

സാസാ പ്രൊഡക്ഷൻസിൻ്റെ ബാനറിൽ പ്രേം ഏബ്രഹാമാണ് ചിത്രം നിർമ്മിച്ചിരിക്കുന്നത്. തിരക്കഥയും സംഭാഷണവും ടോബിത് ചിറയത് . ബോളിവുഡിലും മറ്റും നിരവധി ചിത്രങ്ങളുടെ ഭാഗമായ രാഹുൽ ബാലചന്ദ്രൻ ഛായാഗ്രഹണം നിർവഹിച്ചിരിക്കുന്നു. . ജുബിത് നമ്രദത് ഗാന രചനയും സയനോരാ ഫിലിപ്പ് സംഗീത സംവിധാനവും നിർവഹിച്ചിരിക്കുന്ന ചിത്രം ക്യാപിറ്റൽ സ്റ്റുഡിയോസാണ് തിയറ്ററുകളിൽ പ്രദർശനത്തിന് എത്തിക്കുന്നത്. പി ആർ ഒ- സി. കെ. അജയ് കുമാർ